اجراءات سفر الحيوانات

مبدأيا الموضوع متقسم ل جزئين : 

اجراءات استخراج  جواز سفر الحيوان  و اجراءات شركه الطيران اللي هتسافر عليها

1- اجراءات جواز سفر الحيوان :

بتختلف من بلد ل بلد
في تركيا مثلا لازم يفحصوا الحيوان  وياخذو منه تحليل دم ويبعتوها الى انقرة ولو تأكدوا  من خلوه من الامراض بيوافقوا ع الجواز والعمليه دي بتاخد شهر اجراءات وبتتكلف ٢٠٠ دولار

في مصر بقي صاحب الحيوان  لازم هيروح اداره الطب البيطري في مطار القاهرة  وهيعمل للحيوان حاجه اسمها " وثيقه سفر "  ودي بيكون فيها معلومات عن الاسم والجنس والسن

ودي مش هتطلع الا بعد ما يتكشف عليه ويطلعله أوراق صحية وإذن تصدير يتجاب من الحجر الصحي , ولازم يتأكدوا ان الحيوان اخد كل التطعيمات بتاعته

وفي بعض البلاد بتطلب ان الشهادة الصحيه دي بتاعه خلو الحيوان من الامراض انها تتختم ختم الخارجيه   زي البحرين ( لازم تكون مختومة بعبارة مصرح بالدخول إلى المطار البحرين الدولي).

ملحوظات

* مفيش كلب هينفع يسافر الا بعد ما يتم 4 شهور ولازم يتأكدوا انه معندوش سعار  ولازم  الحيوان مياكلش اي حاجه قبل السفر بساعتين عشان ميجيلوش قئ وغثيان

* لو روحت المطار عشان تسافر بالحيوان من غير ما يكون معاك الوثيقه دي هيتحفظوا علي الحيوان في مكان اسمه المعزل وكل يوم يعدي عليه هناك هتتحمل انت تكاليف اكله وشربه

2- اجراءات شركه الطيران اللي هيسافر عليها

* تذكره سفر الحيوان اللي بنحجزها اسمها هو " تذكرة وزن " وبنحجزها من المطار اللي هنغادر منه
وسموها كدة عشان بتكون قيمتها حسب وزن الحيوان

* في خطوط طيران بتسمح ان الحيوان يطلع علي الكابينه معاك عادي بشرط ان وزنه بالبوكس بتاعه ميزدش عن 8 كليو .. ولو ازيد بيتشحن في الكارجو في بطن الطياره  ومن امثله الخطوط دي مصر للطيران و التركيه

* وفي خطوط تانيه مبتسمحش ابدا ان الحيوان يطلع علي الكابينه معاك ختي لو وزنه قليل ولازم تشحنه في الكارجو في بطن الطياره ومن امثله الخطوط دي هي الاماراتيه

* وفي خطوط طيران ممكن توافق عادي انك تاخد الحيوان علي الكابينه لكن مطار الوصول في البلد اللي هتسافرلها يرفض كدة ويطلب من خط الطيران ان الحيوانات كلها تكون في الكارجو  ومن امثله البلاد دي : UK و Australia  وجنوب افريقيا وبعض الدول العربيه

وكل بلد بتحدد بردو الحيوانات اللي ممكن تدخلها او تمنعها فلازم تشوف علي صفحة السفارة  اللي هتسافرلها أو تكلمهم

وسعر التذكره بتختلف حسب الوزن وحسب خط الطيران اللي هتسافر عليه وكل خط طيران له اسعار حسب المواصفات بتاعته لازم تراجع شركه الطيران ال هتسافر عليها عشان تعرف كل الاسعار

مثال : طيران التركيه :
لو الوزن اقل من 8 كيلو هتدفع 70 ليره فقط
لو الوزن من 9 ل 15 كيلو هتدفع 110 ليره
لو الوزن اكبر من 16 هتدفع 170 ليره

مثال : طيران الاماراتيه :
لو  وزن الحيوان والقفص مع بعض اقل من 23 كجم  هتدفع 500 دولار
لو وزن الحيوان والقفص مع بعض بين 24 و32  هتدفع 650 دولار
لو وزن الحيوان والقفص مع بعض اكثر من 33 كيلو هتدفع 800 دولار

السفر مع الحيوانات متعه اكثر من السفر مع البني ادمين فجربوها 

مقالة دكتور
Ahmed Mohamed