رحلتى الى دهب

المواصلات

المواصلات من اسكندرية الى دهب فقط جوباص
او ناخد السوبرجيت او شرق الدلتا لشرم الشيخ الرويسات ونقول للسواق عاوزين نروح دهب فبيكلم حد من سواقين جوباص مثلا او اى عربية يعرفها فبيقابلهم فى السكة وتنزل تركب معاهم
او اول ما توصل الرويسات فى شرم الشيخ تاخد جوباص من هناك لدهب
بيقولوا blue bus هيعمل خط من اسكندرية لدهب مباشرتا
فى الرجوع ناخد جوباص او شرق الدلتا لشرم ومنها لاسكندرية

وقت السفر

طبعا دهب وجنوب سينا عموما مش بتتراح فى الصيف الجو بيبقى حر جدا

فافضل توقيت ليها هو فصل الشتا يعنى الناس تبقى لابسة ستوى وسقعانة وانتى نازلة البحر

بس بردو لازم تاخدى معاكى جاكت شتوى عشان لو هتزورى سانت كاترين او سفارى الجبل بليل

الاقامة

افضل شىء للاقامة ناخد كامب على الممشي انتى كده فى وسط كل حاجة وقريبة من كل حاجة
ومش محتاحة مواصلات لاى مكان
بالاضافة ان موقف جوباص وشرق الدلتا فى ظهر الممشي يعنى مش محتاج مواصلات للكامب
ومتصدقيش اى سواق يقولك ٢٠ جنيه واوصلك للكامب اسالى الكامب الاول مكانوا فين من الموقف لان ممكن توصلى مشي دقايق فقط

دى مجموعة من الكامبات على الممشي مباشرتا

دهب بلازا موجود فى وش موقف جوباص على طووول  

الرحلات

دى مجموعة من الرحلات بتختار منهم المناسب ليكى طبعا 
على الممشي فى مكاتب كتير بتعمل الرحلات دى وتقريبا اسعارهم متقاربة

طبعا الاسعار دى قديمة واكيد اتغيرت دلوقتى فممكن تتصلوا بيهم تعرف الاسعار ايه عشان تظبطوا الميزانية بتاعتكوا 

الافضل نعمل دايفينج مع شركة متخصصة مش مع الشركات اللى بتعمل الرحلات لانهم بيدوكى سعر اعلى "الكومشن بتاعهم طبعا"

.

مكتب غزالة ناس محترمة جدا وهيخلوا الرحلات ليها طعم تانى

خصم  خاص على جميع الرحلات من مكتب غزالة لرواد الموقع بأسمى داليا فتح الله

اتصلى بعصام  01090008295 مدير مكتب غزالة و هيعملكوا الخصم

ملحوظة مهمة جدا 

- غلط جدا تعمل diving وتطلع جبل موسي بعدها على طول لازم نستنى ١٢ ساعة عشان الضغط على الجسم

- بطاقتك لازم لازم تكون معاكى لان بيشوفوها كل شوية فى الكماين وانتى فى السكة وعند دخول دهب وفى الرحلات كلها تقريبا فلو معكيش بطاقة او مش متجددة متروحيش احسن

رحلة سعيدة 

Dalia Fathalla

تابعونى على الانستجرام 

Dalia.Fathalla

او على صفحة الفيس بوك

Gallery Dalia