لو انت اول مرة في حياتك تسافر وتركب طياره البوست دة ليك عشان تعرف الاجراءات من اول لما تروح المطار لغايه لما توصل البلد ال انت رايحها
اول حاجة لما تروح اي مطار في مصر و تدخل جوه المطار نفسه بتروح على كاونتر شركة الطيران اللى مسافر عن طريقها ( كاونتر = كشك كدة بيكون واقف فيه مندوب شركه الطيران اللي مسافر عليها ) و بتديهم الباسبور و الشنط و تذكرة الطيران الموظف هيراجع التذكرة و الباسبور و الفيزا و هيوزن الشنط و يتأكد انه كله تمام. هيديك كارت كدة اسمه بوردينج باس عليه اسمك و بياناتك و بيانات الرحلة و رقم الكرسى
بعدين بتروح الجوازات عشان يختمولك خروج من مصر , هتعدي علي التفتيش عشان تدخل قاعة الطيارة وبيكون معاك هاندباج بس، ممنوع فيها اي نوع سوائل طبعا. .. هتاخد البوردينج و تروح على رقم البوابة اللى مكتوب على البوردينج ( بوردينج = الطائرة جاهزة لصعود الناس علي متنها ) و هتستنى لغاية باب البوابة ما يفتح و الميعاد ده بيكون مكتوب على البوردينج. لما الباب يفتح هتدى الموظف البوردينج و هيراجع بسرعة البيانات و هيياخد البوردينج و يديك الكعب اللى مكتوب فيه اسمك و رقم الكرسى بتاعك. هتمشى فى الممر لغاية متوصل الطيارة جوه و تشوف فين كرسيك
في الطياره بقي
استخدام الموبايل و اللاب توب مسموح بيه لغاية ما يتم الإعلان عن غلق الهواتف عن طريق طاقم الطائرة لغاية ما يتم الإقلاع بعدها بيكون فى اعلان تانى انه مسموح دلوقتى باستخدام الهاتف و اللاب توب. بس على فكرة مش هيكون فيه شبكة فالموبايل هيكون زى قلته عدا انك تسمع اغانى .. قبل الهبوط بساعة الا ربع بيكون فيه اعلان تانى بغلق الهواتف لغاية ما يتم الهبوط.
بعض خطوط الطيران بيبقى في شبكة موبايل في الطيارة بس بيكون سعر الدقيقة عالي جدا يمكن عشرين جنيه او اكتر
بالنسبة للنت على الموبايل ممكن تشتري واي فاي موجود برضه في بعض الرحلات الطويلة لمعظم خطوط الطيران وبتدفع بالكريدت كارد بيكون غالي (في خطوط طيران زي القطرية بتديلك ساعة مجانا)
الاجهزة بتتحط علي وضع الطيران، و بيبقي في شاشات في الكراسي عليها افلام وموسيقي وكل حاجة اي حد يحتاجها ( دي لو طياره حديثه ) ..
المضيف / المضيفه هيعدوا عليك يدوك وجبتك وبتكون متغلفه وممكن تطلب وجبه كمان لو لسه عندهم وجبات زيادة ( دة لو طيران عادي اما لو طيران اقتصادي ملكش وجبه الا لو دفعت ثمنها بشكل منفصل ) والاحسن من كل دة انك تنام لغايه ما توصل عشان توصل فايق
ليست هناك تعليقات:
إرسال تعليق